अमोल शिरसाट___दोन गझला

1.

वेळ नाही येत सांगुन वेळ मित्रा;

जीवनाचा हा घडीभर खेळ मित्रा.

वाढले प्रेमाविना त्यांचे कुपोषण;

लेकरांना दे जरासा वेळ मित्रा.

पेरले आहेस जे; उगवेल नक्की;

धीर धर... तू थांब थोडावेळ मित्रा.

वाढली आहे तुझ्या हृदयात भेसळ;

रक्त कोठे राहिले निर्भेळ मित्रा.

सोड आता तू असे धरसोड करणे;

होत आहे जीवनाची भेळ मित्रा.

2.

किती तू बोलताना टाळल्या गोष्टी;

तरी मी वाचल्या डोळ्यातल्या गोष्टी.

तुझी तत्वे तुझे स्टेटस तुझा ईगो;

न जाणे तू किती सांभाळल्या गोष्टी.

दिले हे जीवनाने छान अनुभव पण

किती माझ्या जिवावर बेतल्या गोष्टी.

तुला जर होत आहे त्रास तुटण्याचा;

विनाकारण कशाला ताणल्या गोष्टी.

लपवलेल्या खजीन्या सारख्या जपतो;

मनाच्या मी तळाशी ठेवल्या गोष्टी.

उपाशी लेकराला भाकरी द्याना;

नका सांगू अशा बागेतल्या गोष्टी.

जरा करुया कमी नात्यातली कटुता;

चला लक्षात ठेवू चांगल्या गोष्टी.
______________________________