धनंजय तांदळे___गझल

दिवस दिवस भर माझ्यासाठी  राबत होती माझी आई 

घेत कडेवर अनवाणी मज  चालत होती माझी आई 

कातळ रुतले रुतले काटे  वाटा झाल्या वैरी जेंव्हा 

माथ्यावरती सरपण काडी  वाहत होती माझी आई 

गार चुलीवर हात चटकता  सांग कसा गं ढेकर येतो 

अख्खी भाकर भरवुन मजला  फसवत होती माझी आई 

शीत गवसता पेव म्हणाली  दगडालाही देव म्हणाली 

दु:खालाही रंग सुखाचे  चढवत होती माझी आई

गीत माळता तुझ्या ऋणाचे  राहुन गेले बरेच काही 

असेच माझे जीवन सारे  रांधत होती माझी आई 

____________________________________________